Partia e Gjelbër kundër Vendimit të Qeverisë për ndërtimin e centralit bërthamor.

Partia e Gjelbër reagon ndaj Vendimit të Qeverisë për realizimin e projektit të shumë përfolur të centralit bërthamor, si dhe të ngritjes së agjensisë që do të merret me përgatitjen e programit bërthamor për Shqipërinë.

Shqipëria nuk ka nevojë për ndërtimin e një centrali bërthamor pasi ka burime të tjera alternative për prodhimin e energjisë.

Kjo politikë i ka dhënë të gjitha provat që nuk mund të menaxhojë situata të vështira dhe katastrofa. Mjafton të kujtosh tragjedinë në Gërdec dhe jo më të bëhet fjalë për të përballuar një incident bërthamor në një central të kësaj natyre i cili do të shkaktonte dëme të pa llogaritshme jo vetëm për Shqipërinë por dhe për Ballkanin e më gjerë.

Politika jonë ka 20 vjet që sillet keq me mjedisin. Ajo jo vetëm që nuk ka marrë masa për zvogëlimin e Krizës Ekologjike që po kalojmë por, e ka thelluar atë me neglizhencën që ka treguar gjatë këtyre viteve në zbatimin dhe përmirësimin e legjislacionit mjedisor. Të mos e thellojmë më tej këtë krizë duke depozituar mbetjet bërthamore në vendin tonë.

Nëse politika vendos për ndërtimin e një centrali bërthamor, ne Të Gjelbrit, do t’i drejtohemi iniciativës për mbajtjen e një referendumi mbarë kombëtar për ta ndaluar atë. Ne, si të Gjelbër, i themi JO kësaj nisme, pasi është më mirë që t’u trashëgojmë fëmijëve tanë panele diellore dhe jo mbetjet bërthamore që lënë pas këto centrale.